इटहरी । कोशी प्रदेश सरकारको भौतिक पूर्वाधार विकास राज्यमन्त्रीको जिम्मेवारी सम्हालेको १९ दिनमै सपना परियार मन्त्रालयको कार्यकक्षमा सीमित रहिनन् । पदभार ग्रहण गरेसँगै उनी सुनसरीका गाउँबस्ती, विद्यालय, दलित तथा उत्पीडित समुदाय, खेलकुद र कला क्षेत्रदेखि जनयुद्धका घाइते, सहिद तथा बेपत्ता परिवारको घरदैलोसम्म पुग्न थालेकी छन् ।
भदौ १ गते पद तथा गोपनीयताको शपथ लिएलगत्तै उनले सामाजिक सञ्जालमा लेखेकी थिइन्, ‘मेरो यात्रा पदबाट होइन, समुदायबाट सुरु हुन्छ ।’ उनको यो भनाइ औपचारिक अभिव्यक्तिमा मात्र सीमित रहेन । शपथको भोलिपल्टै उनी इटहरी–१७ बालग्राम टोलस्थित मुसहर बस्ती पुगेर स्थानीयका समस्या सुन्नुका साथै जीर्ण सडक तथा बाटोघाटोको स्थलगत अवलोकन गरिन् ।
राज्यमन्त्री परियारले त्यसयता सुनसरीमा विकास निर्माण र जनसरोकारका विषयमा स्थानीयसँग निरन्तर संवाद अघि बढाएकी छन् । इटहरी–१२ खनारमा जनप्रतिनिधिसँग त्यस क्षेत्रको विकास निर्माणबारे छलफल गरेकी उनले दुहबीको सिमल टोल विकास संस्थाका बासिन्दासँग पनि स्थानीय विकासका विषयमा अन्तरक्रिया गरिन् ।
यसैक्रममा इटहरी–७ का वडा सदस्य दीपक घिमिरेको निवासमा पुगेर उनले स्थानीयवासीका गुनासा, आवश्यकता र सुझाव सुनेकी छन्। स्थानीयस्तरमा देखिएका पूर्वाधारसम्बन्धी समस्यालाई प्रत्यक्ष बुझ्ने उद्देश्यले उनले विभिन्न स्थानमा स्थलगत भ्रमणलाई प्राथमिकता दिएकी छन् ।
विद्यार्थी र विद्यालयका समस्या बुझ्दै
राज्यमन्त्री परियार आफ्नो बाल्यकालको सम्झना ताजा गर्दै बराहक्षेत्रस्थित आफूले अध्ययन गरेको जगन्नाथ–डेढराज विद्यालय पनि पुगिन् । विद्यालयमा उनले विद्यार्थी, शिक्षक तथा अभिभावकसँग अन्तरक्रिया गर्दै शैक्षिक अवस्था र उनीहरूका आवश्यकताबारे जानकारी लिइन् ।
ग्रामीण क्षेत्रको सडक तथा भौतिक पूर्वाधारको अवस्था बुझ्ने क्रममा उनी सुनसरीको मधुवनसमेत पुगिन् । बराहक्षेत्र–११ स्थित धनजित आधारभूत विद्यालयमा विद्यार्थीहरू आवतजावत गर्ने सडकको अवस्थाबारे उनले स्थलगत निरीक्षण गरिन् । ग्रामीण क्षेत्रका विद्यालयसम्म पुग्ने सडकको अवस्थाले विद्यार्थीको नियमित पठनपाठनमा पार्ने प्रभावबारे समेत उनले जानकारी लिएकी छन् ।
पूर्वाधारसँगै कला र खेलकुदमा पनि चासो
विकास निर्माणसँगै राज्यमन्त्री परियारले कला, संस्कृति र खेलकुद क्षेत्रलाई पनि प्राथमिकतामा राखेकी छन् ।
इटहरीस्थित ‘संगीत साधना प्रतिष्ठान नेपाल’ पुगेर उनले संगीत सिकिरहेका बालिकासँग समय बिताइन् । प्रतिष्ठानका सञ्चालक प्रदीप रेग्मी र राजु केसीसँग उनले कला क्षेत्रको विकास र स्थानीय प्रतिभाको प्रवद्र्धनका विषयमा छलफल गरिन् ।
त्यस्तै, इटहरीको बुढीगंगा तेक्वान्दो डोजाङबाट अन्तर्राष्ट्रिय प्रतियोगितामा विजयी खेलाडीलाई नगद पुरस्कारसहित सम्मान गर्ने कार्यक्रममा उनी प्रमुख अतिथिका रूपमा सहभागी भइन् ।
सहिद, बेपत्ता र घाइते परिवारसँग आत्मीयता
जनयुद्धको पृष्ठभूमिबाट आएकी राज्यमन्त्री परियारले सहिद, बेपत्ता तथा घाइते परिवारसँगको सम्बन्धलाई पनि प्राथमिकतामा राखेकी छन् ।
१६ औँ अन्तर्राष्ट्रिय बलपूर्वक बेपत्ता पारिएका पीडित नागरिक दिवसका अवसरमा इटहरी र विराटनगरमा आयोजित कार्यक्रममा उनी प्रमुख अतिथिका रूपमा सहभागी भइन् ।
त्यसैगरी, बराहक्षेत्र–२ पुगेर उनले जनयुद्धका घाइते योद्धा ‘जमर्को’लाई भेटिन् । इटहरी–५ का जनयुद्धका सहिद दिनेश खड्काका मातापितालाई भेटेर आशीर्वाद तथा बधाई ग्रहण गरिन् । बेपत्ता योद्धा कमरेड ‘रसिक’का आमाबुवासँग पनि भेटघाट गरी पारिवारिक आत्मीयता साटिन् ।
नेपाली कम्युनिष्ट पार्टी इटहरी उपमहानगर समितिको एकता बैठक तथा शपथ ग्रहण कार्यक्रममा उनले विशेष सम्मानसमेत ग्रहण गरिन् ।
राज्यमन्त्री परियारको पछिल्लो सक्रियताले सामाजिक सञ्जालमा पनि चर्चा पाएको छ । उनको फेसबुक पेजमा आएका प्रतिक्रियाहरूमा पदमा बसेर निर्देशन दिनुभन्दा समुदायमै पुगेर समस्या बुझ्ने शैलीको प्रशंसा गरिएको छ ।
भौतिक पूर्वाधार विकास मन्त्रालयको जिम्मेवारी सम्हालेपछि जनताको घरदैलोमै पुगेर समस्या पहिचान गर्ने उनको प्रयासले स्थानीय तहमा देखिएका पूर्वाधारका समस्या प्रदेश सरकारसम्म पुर्याउन सहज हुने अपेक्षा गरिएको छ । अब भने स्थलगत रूपमा पहिचान गरिएका समस्या समाधानका लागि बजेट, योजना र कार्यान्वयनमा उनको सक्रियता कत्तिको देखिन्छ भन्ने विषय महत्वपूर्ण हुनेछ ।
