धिरेन्द्रकुमार चौधरी
रामधुनी । वैदेशिक रोजगारमा साउदी अरबको एक कम्पनीमा कार्यरत रहेको सुनसरीको रामधुनी नगरपालिका वडा नम्बर ३ निबासी करिब ३६ बर्षीय मनोज चौधरीको मृत्यु भएको मृतकको पारिवारिक श्रोतले जानकारी दिएको छ ।
मृतकका भाइ सरोज चौधरीले कोठामा सुतिरहेको अबस्थामा दाजुको मृत्यु भएको खबर प्राप्त भएको बताए । दाजुसंगै कोठामा बस्दै आएका रामधुनी–६ निवासी कृष्ण चौधरीले असार १७ गते फोन मार्फत मृत्यु भएको खबर सुनाएको उनले बताए । मृत्युको खबर आएपछि परिवार र गाउनै शोकमा डुबेको छ । मृतकको एक पत्नी, एक छोरी, बुबा, आमा, दुई दाजु भाइ रहेका छन् ।
दश महिना अगाडि काठमाडौमा एस.ओ.एस. मेन पावरको सुनसरीकै इटहरीमा रहेको शाखा कार्यालयमार्फत साउदीको दमारमा रहेकोे गुल्फ एशिया कन्ट्राक्टिङ कम्पनि पुगेर नाजिर अल हजिरा कम्पनिमा कार्यरत रहेको बताइएको छ । शोकाकुल परिवारले मृतकको शव ल्याउन पहल गरीदिनु हुन सम्बन्धित निकायहरुलाई आग्रह समेत गरेको छ ।
