इटहरी । प्रतिनिधिसभाका सांसद परशुराम तामाङले भोजपुर जिल्लाको समग्र विकासका लागि दीर्घकालीन गुरुयोजना तयार गरिने बताएका छन् । प्रतिनिधिसभामा निर्वाचित भएपछि शुक्रबार सुनसरीको इटहरीमा आयोजित पार्टीका अगुवा नेता तथा कार्यकर्तासँगको संक्षिप्त भेटघाटमा उनले यस्तो जानकारी दिएका हुन् ।
तामाङले भोजपुरमा जन्मिएर प्रतिनिधिसभामा पुगेका ६ जना सांसदसँग समन्वय गरी जिल्लाको समग्र विकासका लागि साझा खाका तयार पारिने बताए । साथै, भोजपुरबाट काठमाडौं पुगेर विभिन्न पेशा तथा व्यवसायमा संलग्न प्रबुद्ध व्यक्तित्वहरूसँग समेत सहकार्य गर्दै विकासको गुरुयोजना निर्माण गरिने उनको भनाइ छ ।
भेटघाटका क्रममा पार्टीका नेताहरू परशुराम बस्नेत, पदम अधिकारी, शिवकुमार डाँगी, राजेश खतिवडा, दिलकुमार राई, सन्तोष मुक्मिन राई र दिनेश राईलगायतले जिल्लाको विकास निर्माणका विषयमा सांसद तामाङलाई विभिन्न सुझाव दिएका थिए ।
२०३३ सालदेखि वामपन्थी राजनीतिमा सक्रिय तामाङ नेपाल कम्युनिस्ट पार्टी (नेकपा) बाट समानुपातिकतर्फ प्रतिनिधिसभा सदस्य बनेका हुन् । उनी नेकपा आयोजक समिति तथा पूर्व माओवादी केन्द्रको स्थायी समिति सदस्यसमेत भइसकेका छन् ।
फागुन २००८ मा भोजपुरमा जन्मिएका तामाङ अर्थराजनीति, संघीयता, मानव अधिकार, जैविक विविधता, पर्यावरण तथा राज्य पुनःसंरचनालगायत विषयमा कलम चलाउने लेखकका रूपमा पनि परिचित छन् । तामाङ जातिसम्बन्धी विषयमा केन्द्रित गरी उनले दुई दर्जनभन्दा बढी पुस्तक प्रकाशन गरिसकेका छन् ।
