काठमाडौं । आगामी निर्वाचनलाई लक्षित गर्दै नेपाली कम्युनिष्ट पार्टी (नेकपा) ले संगठन सुदृढीकरण र जनपरिचालनलाई प्राथमिकता दिने निर्णय गरेको छ । पार्टी संयोजक पुष्पकमल दाहाल (प्रचण्ड)को अध्यक्षतामा पेरिसडाँडामा बसेको बैठकले तीन बुँदे निर्णय गर्दै देशभर एकीकृत अभियान सञ्चालन गर्ने निष्कर्ष निकालेको हो ।
प्रवक्ता अग्नीप्रसाद सापकोटाद्वारा जारी प्रेस विज्ञप्तिअनुसार, पार्टीले सबै प्रदेशमा ‘एकता सन्देश सभा’ सञ्चालन गर्ने निर्णय गरेको छ । सो अभियानमार्फत पार्टीभित्रको एकता सुदृढ पार्दै जनस्तरमा साझा राजनीतिक धारणा निर्माण गर्ने लक्ष्य राखिएको छ ।
दोस्रो निर्णयमा, आगामी निर्वाचनलाई केन्द्रमा राखी पार्टीले अघि सारेका तयारी कार्यक्रमहरूलाई व्यवस्थित र प्रभावकारी रूपमा अभियानका रूपमा विस्तार गर्ने उल्लेख छ ।
तेस्रो बुँदामा भने पार्टीका जनवर्गीय संगठन, मोर्चा तथा सहायक संरचनाबीच समन्वय र साझा जनपरिचालन कार्यक्रम सञ्चालन गर्न निर्देशन गरिएको छ ।
पार्टीले विज्ञप्तिमा देशभरका जनसंगठनबीच एकता र सहकार्य विस्तारका माध्यमबाट आगामी राजनीतिक तथा निर्वाचन चुनौतीका लागि तयारी तीव्र पारिने बताएको छ ।
