इटहरी । सुनसरीको इटहरीमा जेन–जीको नाममा भइरहेको आन्दोलन हिंसात्मक र अराजकतापूर्ण बन्दै गएपछि इटहरी उपमहानगरपालिकाले ३ दिनका लागि विदा दिने निर्णय गरेको छ ।
नगर प्रमुख हेमकर्ण पौडेलले एक विज्ञप्ति जारी गर्दै भदौ २४ गतेदेखि २६ गतेसम्म नगर कार्यपालिकाको कार्यालय, वडा कार्यालय, शिक्षण संस्था, इटहरी अस्पताल र अत्यावश्यक सेवा बाहेकका सबै स्वास्थ्य संस्था तथा अन्य सरकारी कार्यालयहरू बन्द रहने जानकारी दिएका छन् ।
विज्ञप्तिमा मेयर पौडेलले आन्दोलनको नाममा सुरक्षाकर्मीमाथि ढुंगामुढा प्रहार, सरकारी तथा सार्वजनिक सम्पत्तिमा आगजनी र तोडफोडजस्ता अराजक गतिविधि भएको जनाएका छन् ।
‘आन्दोलनले अराजक रूप लिएको, सुरक्षाकर्मीमाथि आक्रमण र नगर कार्यालयमा तोडफोड र आगजनी भएको’ भन्दै उनले यस्ता गतिविधिको कडा निन्दा गरेका छन् । साथै, ध्वंसात्मक क्रियाकलापमा संलग्नको पहिचान गरी कानुनी कारबाही गर्न मागसमेत गरेका छन् ।
स्थिति थप नबिग्रियोस् भन्ने उद्देश्यले सबै जनप्रतिनिधि, राजनीतिक दल, नागरिक समाज, उद्योगी–व्यवसायी, सञ्चारकर्मी, बुद्धिजीवी लगायत सम्पूर्ण इटहरीवासीहरूलाई संयम र समझदारीका साथ अघि बढ्न उनले आग्रह गरेका छन् ।
उक्त घटनामा मृत्यु भएकाप्रति श्रद्धाञ्जली व्यक्त गर्दै मेयर पौडेलले शान्तिका लागि सबै पक्षको सहयोग अपरिहार्य रहेको बताएका छन् ।
