सुन्दरहरहरैंचा । स्थानीय युवाहरुले सञ्चालन गर्दै आएको सामाजिक संस्था ‘पहिलो पाइला नेपाल’ ले नयाँ कार्यसमितिको चयनसँगै समाज परिवर्तनको अभियानलाई अझ सशक्त बनाउने अठोट गरेको छ । शनिबार सुन्दरहरैंचाको गोठगाउँमा सम्पन्न छैटौँ साधारणसभाले विजय ओझालाई सर्वसम्मत अध्यक्षमा चयन गर्दै ११ सदस्यीय नयाँ नेतृत्व चयन गरेको हो ।
यसअघि सचिवको भूमिकामा सक्रिय रहनुभएका ओझाले युवा परिचालन मार्फत सामाजिक रूपान्तरण सम्भव हुने विश्वास व्यक्त गर्नुभयो । उहाँले भन्नुभयो, ‘सक्रिय युवाको सशक्त सहभागिता बिना समाज रूपान्तरण सम्भव छैन । हामीले गरिरहेको कामले अरू युवालाई पनि प्रेरित गरोस् भन्ने चाहना राखेका छौं ।’
नवगठित कार्यसमितिमा समीक्षा कार्की उपाध्यक्ष, केवल लुइँटेल सचिव, मनोज अधिकारी सहसचिव, विनोद अधिकारी कोषाध्यक्ष र सुप्रिया सिराल सहकोषाध्यक्ष चयन हुनुभएको छ । सदस्यहरूमा सुनिल ढुङ्गाना, किरण सापकोटा, रमेश बस्नेत, निर्मला खड्का र होमबहादुर गौतम हुनुहुन्छ ।
कार्यक्रमका प्रमुख अतिथि, सुन्दरहरैंंचाका पूर्व नगरप्रमुख शिवप्रसाद ढकालले नवनिर्वाचित टोलीलाई प्रमाणपत्र प्रदान गर्नुका साथै युवा नेतृत्वप्रति विश्वास व्यक्त गर्नुभयो । निर्वाचन समिति संयोजक सन्ध्या लामिछानेले पद तथा गोपनीयताको शपथ गराउनुभएको थियो ।
साधारणसभामा स्थानीय विद्यालय ‘पञ्चायत मावि’का तेक्वान्दो खेलाडीलाई खेल सामग्री वितरण गरिनुका साथै अघिल्लो आर्थिक वर्षमा सामाजिक सेवामा योगदान पुर्याउने व्यक्तित्वलाई प्रमाणपत्रद्वारा सम्मान गरिएको थियो ।
