इटहरी । कला, संस्कृति र पर्यटनलाई परस्पर रूपमा समन्वय गर्दै विकास र जनचेतनाको उद्देश्यले गठित तालतलैया कला साहित्य सांस्कृतिक समाजको आयोजनामा एक भव्य सांस्कृतिक कार्यक्रम सम्पन्न भएको छ ।
संस्थाका उपाध्यक्ष रमेशप्रसाद धमलाको सञ्चालनमा सम्पन्न उक्त कार्यक्रममा अध्यक्षता सुधिर केसीले गरेका थिए । कार्यक्रमका प्रमुख अतिथि पूर्वमन्त्री कल्पना धमला रहनुभएको थियो भने विशेष अतिथिका रूपमा साहित्यकार चेतनाथ धमलाको उपस्थिति रहेको थियो ।
कार्यक्रमको विषयगत मुख्य वक्ता जैविक दर्शनका लेखक मोहन तिम्सिना थिए । साथै, अन्य वक्ताहरूमा तालतलैया विकास तथा संरक्षण समितिका पूर्वअध्यक्ष लक्ष्मी खनाल, प्रगतिशील लेखक संघ सुनसरीकी अध्यक्ष विमला पोखरेल, अखिल नेपाल लेखक संघका जिल्ला सहसचिव चन्द्र सुवेदी र संस्थाका सदस्य समाजसेवी तुलाराम दंगाल रहेका थिए ।
गंगा दाहालले स्वागत मन्तव्य राखेको कार्यक्रममा भारतको आसाम र मेघालयबाट समेत अतिथि सहभागी भएका थिए । उनीहरूले आफ्ना सिर्जना प्रस्तुत गर्दै कार्यक्रममा अन्तर्राष्ट्रिय स्वाद थपेका थिए । कार्यक्रममा एक दर्जनजति कविता वाचन तथा मुक्तिनारायण कीर्तन समूहको साङ्गिनी भजन प्रस्तुत गरिएको थियो ।
आगामी दिनहरूमा पनि यस्ता कार्यक्रमलाई निरन्तरता दिइने संस्थाका अध्यक्ष केसीले जानकारी दिनुभयो ।
