बाबुराम मुडियारी
विराटनगर । विश्व वातावरण दिवसको अवसरमा मोरङ जिल्लामा विभिन्न स्थानहरूमा वृक्षरोपण कार्यक्रम गरी दिवस मनाइएको छ । डिभिजन वन कार्यालय मोरङ, विभिन्न वन उपभोक्ता समिति, वन समूह तथा संघ–संस्थाहरूको सहकार्यमा वृक्षारोपण कार्यक्रमहरू आयोजना गरिएका हुन् ।
बेलबारीस्थित सिंहदेवी सामुदायिक वन उपभोक्ता समूह र डिभिजन वन कार्यालय मोरङको संयुक्त आयोजनामा बेलबारीको नदी उकास क्षेत्रमा वृक्षारोपण गरिएको हो । कार्यक्रममा बासका ३०० वटा र खयरका ५०० वटा बिरुवा रोपिएको छ ।
कार्यक्रममा बेलबारी नगरपालिकाका मेयर दिलप्रसाद राई प्रमुख अतिथिको रूपमा सहभागी हुनु भएको थियो । विशिष्ट अतिथिका रूपमा प्रदेश वन निर्देशनालयका निर्देशक इन्द्रप्रसाद सापकोटा, डिभिजन वन कार्यालय मोरङका निमित्त वन अधिकृत राम लखन ठाकुर, पूर्व डिभिजन वन अधिकृत विष्णुलाल घिमिरे, नेपाल वन निगम विराटनगरका प्रमुख ज्ञानकुमार लामा, सव डिभिजन वन कार्यालय बेलबारीका प्रमुख दिपेश मिश्र लगायत अन्य वन अधिकारी, समिति प्रतिनिधिहरू, विद्यालयका प्रधानाध्यापकहरू तथा विद्यार्थीहरूको उपस्थिति थियो ।
कार्यक्रमका वक्ताहरूले वृक्षरोपणमार्फत वन, वन्यजन्तु तथा वातावरण संरक्षणमा सबैले आ–आफ्नो भूमिका खेल्नुपर्नेमा जोड दिएका थिए । कार्यक्रम सिंहदेवी सामुदायिक वन उपभोक्ता समूहका अध्यक्ष लक्ष्मण तामाङ अध्यक्षतामा सम्पन्न भएको थियो ।
