इटहरी । सुनसरीका सेक्स वर्कर महिलाहरु लागूऔषधको लतमा फसेर भयावह स्थिती सिर्जना हुने खतरा सिर्जना भएको छ । सेक्स वर्कर महिलाहरुको हकहितमा कार्यरत संस्था महिला सहयोगी समूह इटहरीले शुक्रबार पत्रकार भेटघाट गरि उनीहरुको संख्या थपिएसँगै कुलतमा फस्नेको संख्या पनि बढ्दो गतिमा छ ।
सेक्स वर्कर महिलाहरुमा लागूऔषध खाने बानी छुट्ने छनक नदेखिएको कार्यक्रममा संस्थाकी पूर्व अध्यक्ष ज्ञाना खड्काले बताइन् । उनका अनुसार अहिलेसम्म २५० जनाले नसालु पदार्थ जाँड रक्सी र चुरोटको लतमा फसेका छन् । यस्तै, धरान क्षेत्रमा १६ जना सेक्स वर्कर महिला कडा खालको लागूऔषध प्रयोग गर्ने गरेका छन् । खासगरेर मानसिक तनाबमा रहेका सेक्स वर्कर महिलाहरुले तनाब कम गर्नका लागि जाँड रक्सी र चुरोटसँगै कडा खाले लागूऔषध प्रयोग गर्ने गरेका हुन् ।
‘एकातिर सेक्स वर्कर महिलालाई मानसिक पीडा छ भने अर्कातिर उनीहरुसँग बस्ने पुरुष ग्राहकले नसालु पदार्थ नखाईकन रमाइलो नै हुँदैन भनेर बाध्य पार्ने गरेका छन,’ उनले भनिन्, ‘यसरी नसालु पदार्थ सेवनले गर्दा दुवैको ज्यान जोखिममा रहने गरेको छ ।’ महिला सहयोगी समूहले नसालु पदार्थ प्रयोग गर्ने महिलालाई परामर्श दिने गरेतापनि पर्याप्त नभएकाले गर्दा सरकारी निकायबाटै लामो समयका लागि कार्यक्रम सञ्चालन गरिनुपर्ने माग गरिन् ।
यहाँ कार्यरत सेक्स वर्कर महिला आफ्ना श्रीमानका कारण पनि त्यो पेसामा संलग्न हुने गरेका छन् । विशेषगरी इनरुवा क्षेत्रमा आफ्ना श्रीमान्कै कारण महिला सेक्स वर्कर बनेका छन् । कतिपय आर्थिक अवस्था दयनीय भएका परिवारमा पुरुषले नै श्रीमतीलाई प्रोत्साहन गर्ने गरेको पनि पत्रकार भेटघाटमा जानकारी दिइयो ।
महिला सहयोगी समूहले सेक्स वर्कर भन्नाले व्यस्क व्यक्तिहरुद्दारा सहमतिमा पारिश्रमिक लिएर गरिने कार्य भएको जनायो । नेपालमा ६७ हजार ३०० सेक्स वर्कर महिला रहेका छन् । जसमा सुनसरीमा एक हजार ५०० सेक्स वर्कर रहेका छन् ।
सुनसरीमा रहेका सेक्स वर्कर महिलाहरु आफ्नै ग्राहकबाट समेत कतिपय सुरक्षित नभएको जानकारी दिइयो । खासगरेर सेवा लिने र पैसा नदिने नियत राखेका ग्राहकबाट महिलाहरु सुरक्षित नभएको महिला सहयोगी समूहकी कार्यकारी निर्देशक विमला ठकुरीले बताइन् । उनका अनुसार महिला सहयोगी समूहले अहिलेसम्म सेक्स वर्कर महिलामध्ये एचआइभी÷एड्स, यौन रोग, हिंसा र क्यान्सरबाट बचाउन विभिन्न खाले कार्यक्रम सञ्चालन गर्दै आएको छ ।
सेक्स वर्कर महिलाहरुले विना गल्ती पक्राउ गर्ने र मानसिक तथा शारीरिक यातना दिइने कार्य बन्द गर्न माग गरेका छन् । सेक्स वर्कर महिलाका लागि महिला सहयोगी समूहले सन् २०२० मा कोरोना भाइरस (कोभिड–१९ ) को महामारीले विश्वलाई नै आक्रन्त बनाएको बेला खाद्यन्नलगायतका राहत सामग्री वितरण गरिएको र नियमित रुपमा सरसफाईका सामग्री एवम् सिनेटरी प्याड प्रदान गर्दै आएको छ । यस्तै, सेक्स वर्कर महिलालाई सही ग्राहक रोज्न र सुरक्षित स्थान पहिचान गर्न सचेतना फैलाउने गरेको छ । सही ग्राहक नरोज्दा कहिलेकाँही अपराधिक मानसिकताका व्यक्तिद्दारा अनपेक्षित रुपमा दुर्घटनाका घटना हुन सक्ने भएकाले गर्दा त्यसमा विशेष सावधानी अपनाउने सचेत गर्ने गरिएको जारी विज्ञप्तिमा उल्लेख छ ।
