इटहरी । नेपाली लोक जीवनका गीत समेटिएको इटहरीका गायत्री लम्सालको हारे आफैँसँगको गीती सङ्ग्रह बुधबार सार्वजनिक गरिएको छ । गीती सङ्ग्रह गीतकार विजय श्रेष्ठ, शिक्षासेवी तथा साहित्यकार लेखनाथ घिमिरे, प्रध्यापक डाक्टर बद्रीविशाल पोखरेललगायतले सार्वजनिक गरे ।
समाजमा सकारात्मक प्रेरणका लागि प्रेरित गर्ने सोचले रचना गरिएका लम्सालको गीती सङ्ग्रहमा ८४ वटा गीत समावेस गरिएको छ । लम्सालले गीती सङ्ग्रह सार्वजनिकका क्रममा महत्वपूर्ण १२ वटा गीत प्रस्तुत गरे । लम्सालका यसअघि दुईवटा कृति आकाश हेर्दै दोबाटो २०६९ र पानीको रंग २०७५ सार्वजनिक भइ सकेका छन् । दोस्रो कृति प्रकाशनपछि लम्सालको बढी संगत गीतकारसँग भएकाले गर्दा गीत रचनामा लागेको बताएका छन् ।
कार्यक्रममा गीतकार बिजय श्रेष्ठले नेपालीपनका गीत भएकाले गर्दा सारै मन परेको बताए । ‘जसरी ऐनमा व्यक्तिको अनुहार देखिएजस्जै गीतमार्फत समाजको अनुहार देखिएको छ,’ उनले भने ।
सो क्रममा कवि मनु मञ्जिलले लम्सालको गीती सङ्ग्रहमा समावेस भएका गीत राष्ट्रिय धरातल टेकेर रचिएको बताए । ‘लोक जनजीवनका गीत गायक लम्सालले एक से एक रचना गरेको पाइयो,’ उनले भने ।
कार्यक्रममा शिक्षासेवी तथा साहित्यकार घिमिरेले लम्सालको गीत रचनामा अब्बल रहेको जनाए । सो क्रममा डाक्टर पोखरेलले समाजलाई सकारात्मक ढंगले गीतमार्फत लम्सालले प्रेरित गरेको र सामाजिक विकृतिलाई पनि व्यङ्ग्य गरेको उल्लेख गरे । सगरमाथा साहित्य प्रतिष्ठान कोशीको आयोजनामा भएको गीती सङ्ग्रह सार्वजनिक कार्यक्रम आयोजक संस्थाकी मिश्रा गुरुङ्को अध्यक्षतामा भएको थियो । कार्यक्रममा सुुनसरी र मोरङ क्षेत्रका साहित्यकार, लेखक तथा गीतकारको सहभागिता रहेको थियो ।
