इटहरी । सुनसरीको इटहरीमा प्रादेशिक ललितकला प्रदर्शनी हुने भएको छ ।
नेपाल ललितकला प्रज्ञा प्रतिष्ठान काठमाडौंको आयोजनामा इटहरी–४ मेट्रिक्समा यही फागुन २९ गतेदेखि चैत्र ३ गतेसम्म ललितकला विधाहरुको प्रदर्शनी हुने भएको हो ।
ललितकला विधाहरु अन्तरगत चित्रकला, मूर्तिकला, लोककला, हस्तकला अलावा वास्तुकलालाई प्रदर्शनीमा समावेश गरिने मेट्रिक्समा शुक्रबार आयोजित पत्रकार सम्मेलनमा जानकारी दिइयो ।
पत्रकार सम्मेलनमा प्राज्ञ संजय बान्तावाले सिर्जनात्मक कलातर्फ छविकला, भिडियो आर्ट, प्रतिस्थापन कला, भावभङ्गीमा कला, कार्टुन, क्यारिकेचर, पोष्टर र डिजीटल कलाको समेत प्रदर्शन हुने जानकारी दिए । कोशी प्रदेश समन्वय समिति संयोजक तथा समसामयिक चित्रकला विभाग प्रमुख बान्तावाले प्रदर्शनीमा १ सय ४७ जनाले सहभागिता फारम भरिसकेको पत्रकार सम्मेलनमा बताए ।
पत्रकार सम्मेलनमा अग्रज पत्रकार गोपाल देवानले संघियताको अनुभूति दिलाउन यो प्रदर्शनीको भूमिका महत्वपूर्ण हुने बताए । देवानले अनुसार यस्ता प्रदर्शनीलाई काठमाडौं बाहिर ल्याउन २०५२ सालदेखि आफूहरुले आन्दोलन चलाएको बताए । उनले पहिलो पटक यो प्रदर्शनी काठमाडौं बाहिर हुन लागेकोले ऐतिहासिक हुने बताए । यो प्रदर्शनीले कोशी प्रदेशलाई कला क्षेत्रमा उर्वरभूमिको रुपमा उभ्याउने आयोजकको विश्वास छ ।
पत्रकार सम्मेलनमा वितरित विज्ञप्तिमा उल्लेख गरिए अनुसार प्रदर्शनीमा समावेश कलाकृतिहरुलाई सर्वोत्कृष्ट राष्ट्रिय ललितकला पुरस्कार, ललितकला पुरस्कार र उत्कृष्ट विद्यार्थी ललितकला पुरस्कार राशी प्रदान गरिनेछ ।
प्रदर्शनीमा सहकार्य इटहरी उपमहानगरपालिकाले गरेको र स्थानीय व्यवस्थापक इटहरी मेट्रिक्स रहेको अग्रज कलाकार विक्रम श्रीले बताए । उनले प्रदर्शनीको तयारीलाई तिव्रता दिएको बताए ।