विराटनगर । विराटनगर महानगरपालिकाका मेयर नागेश कोइरालाले चीनको यिउ सहरमा भएको युनाइटेड सिटिज् एण्ड लोकल गवर्नमेन्ट्स एसिया प्यासिफिक (यूसीएलजी)को कंग्रेस (महाधिवेशन)लाई नेपालका तर्फबाट सम्बोधन गर्नुभएको छ ।
चीन भ्रमणमा रहनु भएका मेयर कोइरालाले यूसीएलजीको नवौं कंग्रेसलाई सम्बोधन गर्नुभएको हो । सो क्रममा मेयर कोइरालाले नेपालको स्थानीय सरकार सञ्चालनका समस्या, चुनौती र अवसरका विषयमा केन्द्रित रहेर विचार राख्नुभएको थियोे । उहाँले नेपालको संविधानअनुसार स्थापित स्थानीय, प्रदेश र संघीय सरकारको आ–आफ्नै विशेषता र क्षेत्राधिकार रहेको बताउनुभयो ।
स्थानीय सरकारसित जनताको सिधै पहुँच हुने भएकाले स्थानीय सरकारसित जनताको धेरै आशा हुने उहाँको भनाइ थियो । यस्तै उहाँले यूसीएलजीको प्रभावकारिता अझै बढाउँदै लानुपर्नेमा जोड दिनुभयो । युसीएलजीको कंग्रेसमा सहभागी हुन मेयर कोइराला कात्तिक २५ गते चीन प्रस्थान गर्नुभएको थियो ।
यसअघि मेयर कोइराला तीन साता लामो अमेरिका भ्रमण गर्नुभएको थियो । अमेरिकामा रहँदा न्यूयोर्कका मेयर, सिनेटरसहित विभिन्न सहरका मेयरसित भेटघाट गर्नुका साथै नेपाली समुदायले आयोजना गरेको कार्यक्रममा समेत सहभागिता जनाउनुभएको थियो ।
