इटहरी । जनतासँग माओवादी विशेष रुपान्तरण अभियान थालेको माओवादी केन्द्रले विपन्न नागरिकलाई लक्षित गरी निःशुल्क स्वास्थ्य शिविर सञ्चालन गरेको छ । शनिबार इटहरी वडा नं. ७ मा आयुर्वेदिक पद्धतिअनुसार निःशुल्क स्वास्थ्य शिविर संचालन गरिएको हो ।
यसै वडाका वडा अध्यक्ष देवनारायण चौधरीको स्वास्थ्य चेकजाँच गरी जनतासंग माओवादी विशेष रुपान्तरण अभियानको उद्घाटन गरिएको छ ।
शिविरमा २ सय जना नागरिकले आफ्नो स्वास्थ्य चेकजाँच गराएका छन् । शिविरमा डा. सन्जिबकुमार यादव, डा सुनिल मण्डल, डा ईश्वर अधिकारी लगायतले सेवा दिएका थिए ।
अभियानका वडा संयोजक जंगराज गिरीले हाड जोर्नी तथा नसा, पेट, छाला, मलद्वार, छाती तथा स्वासप्रस्वास, स्त्री रोग, पिनास तथा नाक कान घाँटीसम्बन्धी साथै पूराना तथा दीर्घ सम्पूर्ण रोगहरुको चेक जाँच गरिएको बताए । चेकजाँच पछि निःशुल्क आयुर्वेद औषधिहरुसमेत वितरण गरिएको गिरीको भनाइछ ।
