इटहरी । दाताहरुको सहयोगबाट सञ्चालन हुदै आएको इटहरीमा रहेको निःसहाय बालबालिका सेवा आश्रममा आश्रय लिने बालबालिकाहरुको संरक्षणका लागि सात समुन्द्रपारी रहेका नेपालीहरुले समेत सहयोग गर्दै आएका छन् । यही क्रममा अमेरिकामा बसोबास गर्दै आएका सुनसरीको रामधुनीका कृष्ण आचार्यले पनि सहयोग गरेका छन् ।
अमेरिकामा बसोबास गर्दै आएका आचार्यले आश्रममा एक लाख एघार हजार एक सय एघार रुपैया नगद सहित बालबालिकाहरुलाई लत्ताकपडा लगायत सहयोग गरेका हुन् ।
आश्रमका बालबालिकाहरुलाई सहयोग गर्न अमेरिकामा बसोबास गर्ने नेपालीहरुले स्थापना गरेको लायन्स क्लब अफ क्वीन्समा रहेका तथा आफु काम गर्ने होटलका साथीहरु समेतबाट संकलित रकम र आफुले थप गरेर सहयोग उपलब्ध गराएको आचार्यले बताए ।
वि.स.२०४४ सालमा स्थापित निःसहाय बालबालिका सेवा आश्रममा दाताहरुको सहयोगले ठुलो महत्व राख्ने बताउदै आश्रमकी सञ्चालिका गिता गौतमले सात समुन्द्रपारबाट आएर समेत सहयोग उपलव्ध गराउनु भएको भन्दै खुशी लागेको बताइन् । उनले हाल आश्रम सञ्चालनमा रहेको स्थान साँघुरो भएकाले भवन बनाउन लागिएको र भवन निर्माणमा समेत सहयोगीहरुको सहयोग महत्वपूर्ण हुने विश्वास व्यक्त गरिन् ।
इटहरी उपमहानगरपालिका वडा नम्बर ४ मा रहेको यस आश्रममा हाल ४८ जना बालबालिकाहरुले आश्रय लिदै आएका छन् । जसमध्ये कोही स्नातक र कोही स्नाकोत्तरसम्म अध्ययन गरिरहेका छन् भने अरु विद्यालय तहमा अध्ययन गरिरहेका समेत छन् । विगतमा आश्रममा आश्रय लिएका कतिपय बालबालिकाहरु विभिन्न पेशा व्यवसायमा आवद्ध भएका र जीवनयापन गरिरहेका छन् ।
