सुनसरी । सुनसरीको सीमावर्ती हरिनगर गाउँपालिकाका विद्यार्थीहरूले स्थानीय पाठ्यक्रममा आधारित पुस्तक पढ्ने अवसर पाएका छन् ।
गाउँपालिकाले निर्माण गरेको स्थानीय पाठ्यक्रममा आधारित पाठ्यपुस्तक विद्यार्थीको हात–हातमा पुस्तक पुगेको हो ।
गाउँपालिकाले ‘मेरो हरिनगर’ नामक पाठ्यपुस्तक कक्षा १ देखि कक्षा ८ सम्मका लागि यस वर्षदेखि लागु गरेको अध्यक्ष गफार अन्सारीले जानकारी दिनुभयो ।
स्थानीय पाठ्यक्रममा आधारित पुस्तक पढ्न पाउँदा विद्यार्थीहरू निकै हर्षित देखिएको अन्सारीले बताउनुभयो । पाठ्यपुस्तकमा स्थानीय कला, संस्कृति, सम्पदा, परम्परा, भाषा, साहित्य, ज्ञान, सीप जस्ता विषय समेटिएको अन्सारीको भनाइ छ ।
आधारभूत तहको ८ सय पूर्णाङ्कमध्ये एक सय पूर्णाङ्कको पाठ्यक्रम स्थानीय तहले नै तयार गर्न पाउने प्रावधान अनुसार गाउँपालिकाले कक्षा १ देखि ८ सम्मको पाठ्यक्रममा आधारित पाठ्यपुस्तक निर्माण गरेको शिक्षा शाखाका अजित कुमार मलिकले जानकारी दिनुभयो ।
गाउँपालिकाका ४० वटा सामुदायिक र संस्थागत विद्यालयमा कक्षा १ देखि ८ सम्मका विद्यार्थीहरूले स्थानीय पाठ्यक्रममा आधारित पाठ्यपुस्तक पढ्दै आएका छन् ।
