इटहरी । तेस्रो संस्करणको मुख्यमन्त्री नक आउट फुटबल प्रतियोगिता ओखलढुंगामा हुने भएको छ । आयोजक कोशी प्रदेश खेलकुद बिकास बोर्डले बुधबार इटहरीमा पत्रकार सम्मेलनको आयोजना गरी असार ४ देखी ९ गतेसम्म ओखलढुंगा खेलकुद बिकास समितिको संयोजनमा प्रतियोगिता आयोजना गर्न लागिएको जानकारी दिएको छ । पहिलो र दोस्रो संस्करण सुनसरीमा आयोजना भएको मुख्यमन्त्री नकआउट फुटबल पहिचानबादीहरुको आन्दोलनका बिच ओखलढुंगामा आयोजना हुन लागेको हो ।
ओखलढुंगामा अहिलेसम्म यत्तिको ठुलो प्रतियोगिता आयोजना नभएकाले पनि प्रदेशको फुटबललाई बिकेन्द्रित गर्ने उद्देश्यले भौगोलिक बिकटताको बाबजुद प्रतियोगिता आयोजना गर्न लागिएको कोशी प्रदेश खेलकुद बिकास बोर्डका सदस्यसचिव हंशराज वाग्लेले जानकारी दिए ।
कोशी प्रदेशका एन्फामा आबद्ध नभएका ओखलढुंगा, तेह्रथुम र सोलुखुम्बुलाई समेत सहभागी गराएर १४ वटै जिल्लाको सहभागीतामा प्रतियोगिताको आयोजना गर्न लागिएको कोशी प्रदेश फुटबल संघका अध्यक्ष किशोर राईले बताए । प्रतियोगिता बिजेताले नगद २ लाख र उपबिजेताले १ लाख रुपैया हात पार्नेछ ।
फेयर प्ले टिमले नगद १० हजार र बिधागतरुपमा उत्कृष्ट हुनेले जनही ५–५ हजार नगद पुरस्कार पाउने बताइएको छ । ३० लाख रुपैया खर्च लाग्ने प्रतियोगितामा ३ सय जना खेलाडी तथा पदाधिकारीका लागि दैनिक १२ सय भत्ता समेत उपलब्ध गराइने आयोजकले जनाएको छ ।
