कुुमोद अधिकारी
विराटनगर । पूर्व पश्चिम तथा दक्षिण क्षेत्रलाई मुख्य राजमार्गसंग जोड्ने गरि निर्माण शुरु गरिएको हुलाकी सडकको ७० प्रतिशत भन्दा वढि काम सम्पन्न भएको छ । मोरङ, सुनसरी तथा सप्तरी जिल्लामा ३ सय ३२ किलोमिटर हुलाकी सडक निर्माण भइरहेकोमा त्यसमध्ये ७० प्रतिशतभन्दा वढि काम सम्पन्न भएको हो ।
सप्तरी देखि झापाको भद्रपुरसम्म निर्माण भइरहेको पूर्व–पश्चिम हुलाकी सडकको काम आगामी १ बर्षभित्रमा सञ्चालनमा आउने गरि काम भइरहेको हुलाकी सडक योजना कार्यालय इटहरीले जनाएको छ । राष्ट्रिय गौरवको आयोजनाको रुपमा रहेको उक्त सडक एकवर्षमा चार लेनमा विस्तार हुने जनाइएको छ ।
हुलाकी सडकको काम अहिले तिव्र गतिमा अघि वढेको हुलाकी सडक योजना कार्यालय इटहरीका प्रमुख विजयकुमार थापाले बताए । दशैं तिहारजस्ता पर्व तथा निर्वाचनका कारण केहि काम ढिलाई भएपनि अहिले आएर कामले गति लिएको र वजेटको समेत अभाव नरहेको कार्यालय प्रमुख थापाको भनाइछ ।
३ सय ३२ किलोमिटर हुलाकी सडक खण्ड अन्तर्गत ठुला ठुला आठवटा पुलको निर्माण कार्य सम्पन्न भइसकेको छ । २४ वटा पुलमध्ये ८ वटा पक्कि पुलको निर्माण सम्पन्न भएको हो । लामो समयदेखी गती लिन नसकेको हुलाकी सडकको कामले तिव्रता पाएपछि सर्वसाधारण समेत उत्साहित भएका छन् । रंगेली नगरपालिका क्षेत्रमा पर्ने वेतौनाको चेका खोलादेखि मधुवनीसम्मको हुलाकी सडकको प्रायः सबै काम सम्पन्न हुने अवस्थामा छ भने वेतौना चोकदेखी विराटनगर सम्मको सडकको काम भने शुरुआती चरणमा छ ।
मोरङको केशलिया खोलादेखी मोरङ–झापाको सिमानमा रहेको रतुवा खोलासम्मको ४४ किलोमिटर सडकमा धमाधम काम भइरहेको छ । सो क्षेत्रमा पर्ने सबै सडक भत्काएको अवस्था छ । सडक समयमा सम्पन्न नहुदा आवत जावतमा समस्या भएकाले सम्वन्धित निकायको ध्यान जानुपर्ने रंगेली–७ का कमलेशकुमार मण्डलको भनाई छ । रंगेली–विराटनगर सडकमा निर्माणको काम भइरहेकाले सडकमा धुलो उड्ने र सडक खाल्टा खुल्टि हुदा विरामीलाई ल्याउन लैजान समेत समस्या भएको मण्डलको भनाई ।
त्यस्तै, हुलाकी सडक अन्तर्गत पूर्व–पश्चिम राजमार्गलाई जोड्ने रंगेली–कानेपोखरी सडकको निर्माण कार्य अन्तिम चरणमा छ । २६ किलो मिटर लामो उक्त सडक खण्डको गेरुवा खोलामा पुल नबन्दा सडकले पूर्णता पाउन सकेको छैन । लामो समयदेखी अलपत्र अवस्थामा रहेको सो पुल नबन्दा वर्षा याममा सवारी साधन तथा सर्वसाधारणलाई आवत जावतमा समस्या हुने गरेको छ ।
