झुम्का । नेपाल भारत मानव विकास एवम् मैत्री संघ काठमाडौं र जिविका कृषि सहकारी संस्था लि.रामधुनी सुनसरीको आयोजनामा कृषि प्रवद्र्धनमा नेपाल भारतबीच सहकार्यको विचार गोष्ठीको आयोजना गरिएको छ ।
रामधुनी–६ मा संचालित जिविका कृषि सहकारीद्वारा संचालित जिविका फार्मर स्कूलको सभाहलमा भएको कार्यक्रममा डा. ऋषिराम कट्टेलले नेपालमा कृषि रणनीति र नाफामुलक कृषिका बारेमा कार्यपत्र प्रस्तुत गरेका थिए ।
कार्यक्रममा सहभागि विज्ञहरुले नेपालको उत्पादन प्रणालीलाई आत्मनिर्भर बनाउने नीति, कार्यक्रम ल्याउनु पर्ने बताएका थिए । कार्यक्रमका नेपालमै उत्पादन गर्न सकिने र भइरहेका खाद्यन्न उत्पादनलाई विस्थापित गर्नेगरि बाहिरबाट आएको खाद्यन्नले बजार कब्जा गर्दा ठुलो मात्रामा अर्थतन्त्र बाहिरिएकोप्रति चिन्ता व्यक्त गरिएको थियो । यस्तो पारिपाटीलाई अन्त्य गर्न भारतीय बजारमा नेपाली उत्पादन पुर्याउन नेपाल भारत मानव विकास एवम् मैत्री संघले महत्वपूर्ण भूमिका निर्वाह गर्नु पर्ने सुझाव कृषि विज्ञ प्राध्यापकहरु सुरेश प्रसाईं र मात्रिका जमरकट्टेलले दिए ।
त्यसैगरि सुनसरीका मानव अधिकारकर्मी रमेश भट्टराईले कुनै पनि विषयमा कार्यपत्रहरु तयार गर्दा नेपाल सरकारको विकास नीतिभित्र रहेर तयार गर्नुपर्ने सुझाव दिए ।
साथै कार्यक्रममा रामधुनी नगरपालिकाका प्रमुख शंकरलाल चौधरी नगर क्षेत्रमा संचालित यस स्कूललाई आफूहरुले सहयोग गर्दै सहकार्य गर्न तयार रहेको बताए । त्यसैगरि बराहक्षेत्र नगरपालिकाका निवर्तमान प्रमुख निलम खनालले जग्गा बाँझो राख्ने प्रवृतिको अन्त्य हुनु पर्ने बताए । खनालले किसानले उत्पादन गरेको वस्तु सरकारले खरिद गर्नुपर्नेमा जोड दिए ।
विचार गोष्टीमा नेपाल भारत मानव विकास एवम् मैत्री संघका अध्यक्ष सूर्य भुसालले समृद्ध नेपाल बनाउन भारतको सहयोग लिन आवश्यक रहेको भन्दै त्यसको लागि आफूले सहजीकरण गर्ने प्रतिवद्धता व्यक्त गरे ।
जिविका कृषि कलेजका व्यवस्थापक शिवकुमार डाँगीले ग्रामिण क्षेत्रका प्रौढ र युवाहरुको कृषि सम्बन्धी ज्ञान, सिप, क्षमतामा आमूल परिवर्तन ल्याउनु सहकारी उद्देश्य रहेको बताए । डाँगीका अनुसार फार्मर स्कूल परिसरको ९ विगाहा जमिनमा बेमौसमी तरकारी उत्पादन र प्रशोधन, बाख्रापालन, दुग्द्यजन्य उत्पादन, ग्रामिण पशु स्वास्थ्य कार्यकर्ता उत्पादनजस्ता कार्यक्रम संचालन गरिएको छ ।
साथै तालिमको लागि उपलब्ध फार्म तथा प्रयोगशालाहरु, जनशक्ति र प्रशिक्षार्थीको योग्यताजस्ता कार्यक्रम पनि संचालन गरिएको छ ।
संस्थाले कृषि तथा वनविज्ञान विश्वविद्यालयबाट सम्बन्धन लिनएर कृषि विषयमा स्नातक तहको अध्यायनसमेत गराइरहेको छ ।
कार्यक्रममा प्राध्यापक डिल्ली सेढाईंले स्वागत मन्तव्य राखेका थिए भने सभापतित्व सहकारीका उपाध्यक्ष नवराज चापागाईंले गरेका थिए ।
