इटहरी । मंसिर ४ गते हुने प्रतिनिधिसभा तथा प्रदेशसभा निर्वाचन मिति जति नजिक आउँदैछ, उमेदवार र दलका नेता, कार्यकर्ताहरुको मत माग्ने शैली त्यत्तिकै फेरिदो छ ।
सुनसरीको प्रतिनिधिसभा निर्वाचन क्षेत्र नम्बर ३, प्रदेशसभा क्षेत्र नम्बर १ की उमेदवार सरस्वती पोखरेल (डाँगी) ले धान काट्दै मत मागिरहेकी छन् । निर्वाचनको प्रचार प्रसारको लागि मतदाताको घर घरमा पुगेकी पोखरेलले खेतमै पुगेर किसानसँगै धान काट्दै मत मागेको नेकपा माओवादी केन्द्र खनारका नेता दीपक विकले बताए ।
विककाअनुसार इटहरी १२, १३ घर दैलो कार्यक्रम गर्ने क्रममा महिला मतदाताले धान काटेको देखेर बाम लोकतान्त्रिक गठबन्धन सुनसरी प्रदेश क्षेत्र १ उमेदवार सरस्वती पोखरेल पनि धान काट्न सहभागी भइन् र मत मागिन् ।
घर दैलो अभियानकै क्रममा बाम लोकतान्त्रिक गठबन्धनको नीति तथा कार्यक्रम मन पराएर नेकपा एमाले सुनसरी जिल्ला सदस्य रियाज आलमसहित नगर सदस्यहरु माओवादी केन्द्रमा समाहित भएको पोखरेल उमेदवार भएको क्षेत्रका चुनाव प्रचार प्रसार संयोजक राजन काफ्लेले बताए । माओवादी केन्द्र प्रदेश १ उपाध्यक्ष शिवकुमार डाँगीले उनीहरुलाई पार्टीमा स्वागत गरेका छन् ।
मतदाता भेटघाटलाई तिव्रता दिएकी पोखरेलले दुहबी–२, ३, ४ मा घरदैलो अभियान गरेकी छन् । त्यसैगरि, इटहरी–९ र ११ मा पनि घरदैलो गरिएको संयोजक काफ्लेले बताए ।
