बैतडी । बैतडीको डिलाशैनी गाउँपालिकाको प्रशासकीय भवन बनाउनका लागि स्थानीयले जग्गा दान गरेका छन् ।
गाउँपालिकाको प्रशासकीय भवन निर्माण, आधारभूत स्वास्थ्य केन्द्र र प्रहरीचौकीका लागि स्थानीयले जमिन दान गरेका डिलाशैनी गाउँपालिकाका अध्यक्ष सन्तोषप्रकाश जोशीले जानकारी दिए। गाउँपालिकाको केन्द्र रहेको वडा नं ७ का स्थानीयले २० रोपनी, १० शय््याको अस्पताल भवन निर्माणका लागि १० रोपनी र प्रहरीचौकी निर्माणका लागि पाँच रोपनी जग्गा दान गरेका हुन् ।
स्थानीय हर्कबहादुर धामी, खडक धामी, वीरे धामी, गगन धामी, प्रेम धामी, रतन धामी, ललुवा धामी, मानसिंह धामी, रामसिंह धामी, डम्मर धामी, मानबहादुर धामी, कालुसिंह धामीलगायत २१ जनाले जग्गा दान गरेका हुन् । जमिन दान गर्नेलाई गाउँपालिकाले सम्मान गरेको छ ।
स्थानीयले जग्गा दान गरेपछि गाउँपालिकाको प्रशासकीय भवन निर्माण, आधारभूत स्वास्थ्य केन्द्र र प्रहरीचौकी निर्माण गरिने भएको छ । यसअघि यहाँ भवन नहुँदा समस्या भइरहेको थियो ।
