कुमोद अधिकारी विराटनगर । प्रदेश नम्बर १ लाई शुक्रबार साक्षर प्रदेशको घोषणा गरिएको छ । सामाजिक विकास मन्त्रालयद्वारा विराटनगरमा आयोजित कार्यक्रममा प्रदेस नं. १ का सभामुख प्रदीपकुमार भण्डारीले प्रदेस १ लाई साक्षर प्रदेश घोषणा गरेका हुन् । युनेस्कोले तोकेको १२ वटा मापदण्डलाई आधारमा प्रदेशलाई साक्षर प्रदेस घोषणा गरिएको हो । सो अवसरमा बोल्दै सभामुख भण्डारीले साक्षरता घोषणासंगै अब प्रदेशलाई आर्थिक समृद्धिको प्रदेश बनाउने अभियानमा सबैले आफ्नो ठाउँबाट सहयोग पुर्याउनुपर्ने बताए । सभामुख भण्डारीले प्रदेश सरकारको नीति तथा कार्यक्रममा उल्लेख भए अनुसार साक्षर प्रदेश घोषणा गर्न सफल भएकोमा खुशी व्यक्त गरे । सामाजिक विकास मन्त्री राजन राईले साक्षर प्रदेशको घोषणा सवैका लागि गौरवको कुरा भएको उल्लेख गर्दै समृद्धिका लागि व्यवसायिक, गुणस्तरीय शिक्षा आवश्यक रहेकोमा जोड दिए । स्वास्थ्यमन्त्री जयराम यादवले राष्ट्रियता, मातृभुति र मातृभाषाप्रति समर्पित रहन विद्यार्थीहरुलाई आग्रह गरे । खानेपानी, सिंचाई तथा उर्जामन्त्री रामकुमार राईले अबको शिक्षा जागिर खानका लागि मात्र नभई व्यवहारिक हुनुपर्ने बताए । सामाजिक विकास राज्यमन्त्री विष्णु तुम्वाहाम्फेले प्रदेशलाई साक्षर घोषणा गर्न सबैको सहयोग रहेको उल्लेख गर्नु भयो । विराटनगर महानगरपालिकाका उपप्रमुख शिल्पा निराला कार्की, प्रदेश नं १ का प्रमुख सचिव विनोदप्रकाश सिंह, सामाजिक विकास मन्त्रालयका सचिव दीर्घराज मैनाली, तथा सामाजिक विकास समितिका सभापति सरिता थापा खड्काले गुणस्तरीय तथा प्राविधिक शिक्षामा जोड दिए । साक्षर प्रदेश घोषणा समारोह अघि प्रभातफेरीको समेत आयोजना गरिएको थियो ।
