धिरेन्द्रकुमार चौधरी उदयपुर । सप्तकोसी नदिमा उदयपुर जिल्लाको बेलका नगरपालिका वडा नम्बर ८ मा भएको कटानबाट बाढी पस्दा त्यस क्षेत्र डुबानमा परेको छ । बुधबार बिहानको समयमा कोशी नदिको तटबन्ध कटान गर्दा नपाको वडा न. ३ र ८ मा रहेकोे वडाको बिभिन्न भाग डुबानमा परेको हो । कटानबाट कोशी नदिको बाढी जाने क्रम अझै रोकिएको छैन । स्थानीयबासीका अनुसार यहाँको खेत घर सबै डुबान भएको छ । पीडितहरु कोहि स्थानीय बिद्यालय र कोहि त्रिपाल टाङ्गेर बसिरहेका छन् । त्यस क्षेत्रका किसानको धान बाली सबै डुबानमा रहेको छ । त्यस क्षेत्रमा खोला नाला र पहाड रहेको छ । यसले गर्दा होचा भाग डुबानमा रहेको स्थानीयले बताएका छन् । बेलका नपा ८ कि स्वेता दाहालले डुबानमा परेका पीडितलाई खान, बस्न समस्या रहेको बताइन् । बेलका नपा ९ बस्ने चन्द्रबहादुर गुरुङले नपाको वडा नं. ३ र ८ मा बाढी पसेको जानकारी दिए । एक महिना अगाडि त्यस क्षेत्रमा बोरामा माटो भरी तटबन्ध मर्मत गरेको स्थानीयले बताएका छन् । स्थानीयले नदिको कटान र बाढी कता पस्ने हो डराइ डराइ दिन बित्ने गरेको बताए । त्यसैगरी कोशिमा पानी बढी भएको कारण कोशी नदिको बिच भागमा रहेको टप्पु क्षेत्रमा बसोबास गर्नेहरुले समेत कष्टकर जिवन बिताइरहेका छन् । टप्पु क्षेत्रमा बराहक्षेत्र नपाको ६, ९ वडा र बेलका नपाको दुई वटामा बसोबास रहेको छ । बराहक्षेत्र नपाका नगरप्रमुख रमेश कार्कीले टप्पुबासी अझै जोखिममा रहेको जानकारी दिए । उनले नपाले त्यस क्षेत्रकाबासीलाई सुरक्षित स्थानमा बस्न आग्रह गरेको जानकारी दिए । बेलका नपा ८ का वडा सचिव दिलिप राईले बाढी पसेको क्षेत्रमा खेत र घर डुबानमा रहेको जानकारी दिए । उनले अहिलेसम्म मानबीय क्षती नभएको जानकारी दिए ।
