दीपक कार्की
इटहरी । बिक्रीका लागि राखिएका खाद्य सामाग्रीहरुको म्याद गुज्रिएको पाइएपछि सुनसरीको इटहरीमा संयुक्त अनुगमन टोलीले तत्काल म्याद गुज्रिएका सामानहरु नष्ट गरि व्यवसायीलाई सचेत गराइएको छ ।
जिल्ला प्रशासन कार्यालय समेतको सहभागितामा गरिएको बजार अनुगमनका क्रममा इटहरीको मुख्य बजार क्षेत्रका केही पसलहरुमा म्याद गुज्रिएका सामानहरु फेलापछि नष्ट गरिएको हो ।
अनुगमनका क्रममा खाद्य पसलहरुमा केही सामानको म्याद गुज्रिएको पाइएको खाद्य तथा गुण नियन्त्रण डिभिजन कार्यालयका प्रमुख काशिनाथ घिमिरेले जानकारी दिए ।
स्थानीय निकाय समेतको सहभागितामा जिल्ला प्रशासन, घरेलु तथा साना उद्योग कार्यालय लगायतको सरोकारवालाहरुको समेत उपस्थितिमा बजार अनुगमन गर्ने क्रममा मसला, खाने तेल लगायतका वस्तुको म्याद गुज्रिएको पाइएका हुन् ।
बजार अनुगमनका क्रममा दैनिक उपभोग्य वस्तुका म्याद गुज्रिएको पाइएको बताउदै यस पटकलाई सचेत गराइएको घरेलु तथा साना उद्योग कार्यालय सुनसरीका प्रमुख राजन पाण्डे बताउछन् । उनले सरोकारवाला निकायहरुसंग समन्वय गरेर आलोपालोमा अनुगमनलाई निरन्तरता समेत दिने जानकारी गराए । संयुक्त बजार अनुगमन टोलीले इटहरीमा होलसेल खाद्यान्न लगायतका पसलहरुमा अनुगमन गरेको थियो । अनुगमनका क्रममा उपभोग्य म्याद, व्यवसाय दर्ता, नवीकरण, कर चुक्ता भए नभएको विषयलाई हेरेको थियो । अनुगमनमा इटहरी उपमहानगरपालिकाकी उपप्रमुख संगिताकुमारी चौधरी उपभोक्ता मञ्च नेपालका अध्यक्ष ठगेन्द्रप्रसाद आचार्य लगायतको सहभागिता रहको थियो ।
