कुमोद अधिकारी
विराटनगर । पूर्व राष्ट्रपति रामवरण यादवले प्राविधिक शिक्षा आजको आवश्यकता रहेको बताएका छन् ।
मोरङको जहदा गाउँपालिका–४ मा रहेको शैलैजा आचार्य स्मृति पोलिटेक्निकको अनुगमन निरीक्षण पछि आयोजित कार्यक्रमा प्राविधिक शिक्षाले व्यवसायिक जनशक्ति उत्पादन गर्ने भएकोले शिक्षामा सवैको पहुँच आवश्यक रहेको बताए ।
शिक्षामा सबैको पहुँच पु¥याउन ग्रामिण क्षेत्रका गरिब तथा विपन्न समुदायलाई लक्षित गरेर सरकारले योजना बनाउनु पर्ने उनले बताए ।
शैलैजा आचार्यको नाममा स्थापना भएको प्राविधिक शिक्षालयको विकासमा संघ, प्रदेश, स्थानीय गरि तीनैतहको सरकारको ध्यान दिनुपर्नेमा उनले जोड दिए ।
उनले समुदाय शिक्षित भएमा मात्र समाज परिवर्तन हुने भएकाले सबैलाई न्यून शुल्कमा शिक्षाको व्यवस्था मिलाउनुपर्ने बताए । उनले प्राविधिक शिक्षा हासिल गरेपछि आफूले सिकेको ज्ञान र सिपलाई राष्ट्रको हितमा उचित प्रयोग गर्नुपर्ने बताए । उनले जातीय समाजभन्दा माथि उठेर मुलुक र समाजको विकासमा सबै लाग्नुपर्ने बताए ।
सिटिभिटी तथा कृष्णप्रसाद कोइराला सेवा गुठीको साझेदारीमा सो पोलिटेक्निक संचालनमा आएको हो । ३ विघा क्षेत्रफलमा फैलिएको सो विद्यालयमा अहिले ५ सयभन्दा वढि विद्यार्थी अध्यनरत रहेको सो विद्यालयका प्रमुख सन्तबहादुर अधिकारीले बताए ।
