इटहरी । सुनसरीको इटहरी उपमहानगरपालिकाको पहिलो कार्यपालिका बैठक शुक्रबार बसेको छ ।
उपमहानगरपालिका कार्यालयको सभाहलमा स्थानीय तह दोस्रो निर्वाचनको पहिलो कार्यपालिका बैठक बसेको हो ।
नगरप्रमुख हेमकर्ण पौडेलको अध्यक्षतामा बसेको बैठकले केही महत्वपूर्ण निर्णयहरू पनि गरेको छ ।
बैठकमा कार्यालयमा फर्निचर हुँदाहुँदै नयाँ जनप्रतिनिधिहरुका नाममा फर्निचर सामाग्री खरिद गरी अनियमितता गरेको भन्दै कार्यपालिका सदस्यहरुले ती सामाग्री कसरी खरिद गरियो भन्दै प्रष्ट हुन चाहेका थिए ।
नवनिर्वाचित जनप्रतिनिधिले काम थाल्दै गर्दा कर्मचारी भने सामान खरिदमा हतारिनुलाई अनियमितता हुनसक्ने भन्दै कार्यपालिका सदस्यहरु प्रष्ट हुन चाहेका हुन् ।
कार्यपालिका सदस्यले प्रष्ट हुन चाहेको विषयलाई इटहरी उपमहानगर कार्यालयका प्रमुख प्रशासकीय अधिकृत रामचरित्र मेहताले वडा सचिवहरुसँग छलफल गरेर केही वडाहरुमा नयाँ जनप्रतिनिधि बस्नको लागि केही थान कुर्सी र सोफा सेटहरु खरिद गरेको बताएका थिए । मेहताले वडा कार्यालयहरुलाई व्यवस्थित गर्न फर्निचर खरिद गरिएको प्रष्ट्याएका छन् ।
कार्यपालिका बैठकमा सदस्यहरुले बैठकको मर्यादालाई कायम राख्न सकेनन् । उनीहरु कोही मोवाइल खेलाइरहेका थिए भने कोही आफ्नो ठाउँबाट अर्को ठाउँमा घुमफिर गरिरहेका थिए ।
