इटहरी । सुनसरीको इटहरी उपमहानगरपालिकाको मेयर पदमा नेपाली कांग्रेसका उम्मेदवार हेमकर्ण पौडेलले ३३ हजार ४९ मत ल्याई विजयी भएका छन् । उनका निकटतम प्रतिद्वन्द्वी नेकपा (एमाले) का यामकुमार चुङवाङ सुब्बाले २८ हजार ३१ मत प्राप्त गरेका छ । पौडेल इटहरी काँग्रेसका सभापति हुन् भने सुब्बा एमाले इटहरीका अध्यक्ष हुन् ।
यसैगरी उपमेयर पदमा एमालेका उम्मेदवार सङ्गीताकुमारी चौधरी ३२ हजार ४३६ मतसहित विजयी भएकी छन् । उनका निकटतम् प्रतिद्वन्द्वी नेकपा (एकीकृत समाजवादी)का उम्मेदवार केशवकुमार विष्टले १८ हजार ३१ मत प्राप्त गरेको निर्वाचन अधिकृतको कार्यालयले जनाएको छ । विष्ट नेकपा एसका केन्द्रीय सदस्य एवम् राष्ट्रिय खेलकुद परिषदका पूर्व सदस्य सचिव हुन् भने संगिताकुमारी चौधरी राजनीतिमा नयाँ हुन् ।
इटहरी उपमहानगरका २० वडामध्ये १४ वटा वडामा एमाले विजयी भएको छ । ५ वटा वडामा कांग्रेस विजयी भएको । १४ नम्बर वडामा एमालेको बाघी उम्मेदवार विजयी भएका छन् ।
एमालेले वडा नम्बर २, ३, ४, ५, ७, ९, ११, १२, १५, १६, १७, १८ र १९ जित निकालेको छ । नेपाली काङ्ग्रेसले वडा नम्बर १, ६, ८, १३ र २० मा जितेको छ । नेकपा एसले वडा नम्बर १४ मा वडा अध्यक्ष पाएको थियो । वडा नम्बर १० र १८ मा वडा अध्यक्ष माओवादीले पाएको थियो । यी वडामा जित एस र माओवादीले जित निकाल्न सकेनन् ।
