धनकुटा । नेपाल सरकार उद्योग वाणिज्य तथा आपूर्ति मन्त्रालय, ग्रामिण उद्यम तथा विपे्रषण आयोजना समृद्धिको वित्तीय सहयोग र हेल्भेटास नेपालको प्राविधिक सहयोगमा मल्टी स्किल एण्ड इन्भारोमेन्ट डेभलपमेन्ट प्रालिद्वारा धनकुटा र पाख्रिवास नगरपालिकामा ६० जना युवालाई सिपमुलक तालिम दिएको छ ।
जसमा धनकुटा नगरपालिकामा टेलरिङ्ग २० जना र व्यूटिसियन २० जना र पाख्रिबास नगरपालिकामा २० जना मेसन गरी जम्मा ६० तालिम प्रदान गरिएको मल्टी स्किल कार्यक्रम संयोजक विकास खनालले जानकारी दिए । पाख्रिबासको मेसन तालिम समापन कार्यक्रममा बोल्दै कार्यक्रम संयोजक खनालले सम्पूर्ण प्रशिक्षार्थीलाई सिटीईभिटीईबाट सिप परिक्षण गराई व्यावसाय संचालन र रोजगारीमा पनि सहजीकरण गरिने बताए ।
साथै कार्यक्रम समापनमा बोल्दै वडा अध्यक्ष फणिन्द्र तामाङ्गले तालिम गुणस्तरीय रुपमा संचालन भएको र सिप सिकेका युवाहरु अब वेरोजगार बस्नु नपर्ने भन्दै रोजगार बनाउन वडाले पनि पूर्ण सहजीकरण गर्ने बताए ।
साथै प्रशिक्षार्थीहरुलाई वित्तिय शिक्षा तथा व्यावसायिक ज्ञान तालिम पनि संचालन गरिएको छ ।
मल्टि स्किलद्वारा धनकुटा, भोजपुर र सुनसरी मोरङ गरी ४२० जनालाई व्यावासायिक सिपमुलक तालिम साथै सुनसरी र मोरङमा १२० जनालाई औद्योगिक प्रशिक्षार्थी तालिम संचालन गरिएको कार्यक्रम संयोजक खनालले जानकारी दिए ।
