इटहरी । सुनसरीको बर्जु गाउँपालिकाको वडा नम्बर १ मा बनाउन थालिएको आधारभूत स्वास्थ्य कार्यालय भवन निर्माण कार्य कोरोनाकाकारण प्रभावित बनेको छ ।
७० प्रतिशत निर्माण कार्य भएपनि बाँकी ३० प्रतिशत काम कोरोनाकाकारणले अघि बढ्न नसकेको सोही गाउँपालिका १ नम्बर वडा अध्यक्ष श्याम गुरुङ्गले बताउनु भयो ।
नेपालमा लक डाउन सुरु हुनुभन्दा एक महिना अघि ४० लाख लागतमा ४ कोठे भवन निर्माण कार्य थालिएको थियो । कोरोनाको कारण निर्माण मजदुर परिचालनमा कठिनाई उत्पन्न भइ हाल सो भवन निर्माण कार्य स्थगित भएको छ ।
आधारभूत स्वास्थ्य कार्यालय भवन निर्माण कार्य सम्पन्न भएपछि ६ औं तहको स्वास्थ्य कर्मचारीबाट सेवा प्रवाह हुने वडा अध्यक्ष गुरुङ्ग बताउनु हुन्छ । संघ र प्रदेश सरकारको सहयोगमा स्वास्थ्य कार्यालय भवन बनाउन थालिएको उहाँको भनाई छ । सोही वडाको वडा कार्यालय भवन र स्वास्थ्य कार्यालय भवन एउटै परिसरमा बनाइदैछ । यी दुबै भवन निर्माणका लागि ५ कठ्ठा १२ धुर जग्गा रामसीता स्कूलले उपलब्ध गराएको हो ।
त्यसैगरी, बर्जु गाउँपालिकाको १ नम्बर वडाले वडावासीलाई कोरोनाबाट बचाउने उद्देश्यले विविध कार्यक्रम संचालन गरेको छ ।
वडा अध्यक्ष श्याम गुरुङ्गले बताउनु भएअनुसार वडाबासीलाई स्वास्थ्य सचेतना जगाउनका लागि जनप्रतिनिधिहरुको तर्फबाट घरदैलो अभियान संचालन गरिएको छ । सो अभियानको क्रममा माक्स, सेनिटाइजर, साबुनलगायत स्वास्थ्य सामाग्री वितरण पनि गरिएको छ । वडामा विभिन्न लाभग्राहीको अवस्था विश्लेषण गरी दाल, चामल, तेल, नुनजस्ता खाद्य सामाग्री वितरण गरिएको गुरुङ्गले बताए । त्यसरी राहत पाउनेहरु वडाभित्रका ११ सय घरधुरी रहेका छन् ।
