हामीहरु अहिले विश्वव्यापी महामारीका रुपमा फैलिएको कोरोना भाइरस (कोभिड–१९) विरुद्धको संघर्षमा छौं । यसको संक्रमण रोक्नका लागि देश लकडाउनको अबस्थामा रहेको पनि ७ हप्ता भएको छ । यति लामो अबधिसम्म तपाईहरुले कायम गरिरहनु भएको धैर्यतालाई हार्दिक सम्मान व्यक्त गर्दै बाँकी दिनहरुमा पनि यस्तै धैर्यताको अपेक्षा गर्दछु ।
हाम्रो प्रदेशमा कोरोना संक्रमितको संख्या ३५ पुगे पनि निको भएर घर फर्कनु हुनेको संख्या पनि त्यत्तिकै मात्रामा छ । हालसम्म १६ जनाले कोरोनालाई जितेर घर फर्कनु भएको छ ।
कोरोना भाइरसलाई जितेर अस्पतालबाट डिस्चार्ज हुनुभएका सबैलाई बधाई सहित सु–स्वास्थ्यको कामना गर्दछु । चिकित्सक, स्वास्थ्यकर्मी तथा उपचार प्रक्रियामा संलग्न संबद्ध सबैलाई हार्दिक धन्यबाद व्यक्त गर्दछु ।
अहिले हाम्रो प्रदेशमा पीसीआर प्रविधिबाट तीन ठाउँमा कोरोना स्वाब परीक्षण हुन थालेसँगै कोरोना परीक्षणको दायरा समेत बढाएका छौं । यतिबेला हामी धेरै भन्दा धेरैको कोरोना परीक्षणमा केन्द्रित छौं ।
पिसिआर प्रविधिबाट २२ सय बढीको परीक्षण भएको छ भने आरडीटिबाट ८ हजार बढीको परीक्षण भइसकेको छ । यसरी हामी प्रत्येक दिन परीक्षणको दायरा बढाउने काममा सक्रिय छौं ।
उपलब्ध अत्यावश्यक स्वास्थ्य सामाग्रीहरु सबै ठाउँ पुगेको छ । आवश्यक स्वास्थ्य सामाग्री प्राप्त हुनुका साथै मौज्दात समेत रहेको छ । आवश्यकता अनुसार जुनसुकै बेला सामाग्री पठाउन सकिने कुरा जानकारी गराउँन चाहन्छु । यसरी हामी अहोरात्र कोरोना भाइरस रोकथाम, नियन्त्रणका लागि खटिरहेका छौं । तपाईहरुको सुरक्षाका लागि सरकारले कुनै कसर बाँकी नराख्ने कुरा म पुनः दोहोर्याउन चाहन्छु ।
समयमै कार्ययोजना बनाएर हामीले गरेको राम्रो तयारीका कारण हामी सामान्य अवस्था छौ । तर अझै जोखिम भने कायमै छ । कोरोना रोकथाम तथा नियन्त्रणमा अग्रभागमा खटिरहनु भएका चिकित्सक, स्वास्थ्यकर्मी, सुरक्षाकर्मी, स्वयम् सेवक लगायत सबैप्रति हार्दिक धन्यवाद व्यक्त गर्दछु ।
लकडाउन हाम्रै लागि हो, लकडाउनको पालना गर्दै सुरक्षित ढङ्गले बस्नुपर्छ भन्ने तपाईहरुको धारणाले कोरोना रोकथाम र नियन्त्रणमा ठूलो सहयोग पुगेको छ । यसरी नै तपाई हामी एकताबद्ध भएको खण्डमा हामीहरु कोरोना भाइरसलाई अवश्य जित्न सफल हुनेछौं । तपाईहरु ढुक्क हुनुहोस्, हामी तपाईहरुकै साथमा छौं । धन्यवाद ।
