इटहरी । लक डाउनलाई ब्यवस्थित गर्दै सरकारले गरेका निर्णयलाई प्रभावकारी ढंगले कार्यान्वयन गर्न इटहरी उपमहानगरले सरोकारवाला सँग वैठक सम्पन्न गरेको छ ।
नगरप्रमुख द्वारिकलाल चौधरीको अध्यक्षतामा भएको वैठकले संघीय सरकारले गरेका निर्णय प्रभावकारी ढंगले कार्यान्वयन गर्ने निर्णय गरिएको छ । बजार अनुगमनलाई तिव्रता दिइने भएको छ । जनप्रतिनिधि, प्रहरी प्रशासन, उद्योग वाणिज्य संघ र नागरिक समाजको सहभागितामा वैठक भएको हो ।
सरकारले कोरोना भाइरसको सम्भावित जोखिमबाट बच्नका लागि आउँदो जेठ ५ गतेसम्म लकडाउनलाई कायम गरे पनि विकास निर्माणका काम खुला गर्ने निर्णय गरेको थियो । यातायात, बजार र शिक्षण संस्थाबाहेक धेरै उद्योगधन्दा र कलकारखाना खोल्न पाइने भएको छ । लकडाउनका अवधिमा औषधि, स्वास्थ्य सामाग्रीजस्ता अतिआवश्यक वस्तुको उत्पादन तथा बिक्री वितरण, खाद्य, कृषिजन्य, पशुजन्य उत्पादन तथा बिक्री वितरण, औद्योगिक वस्तुको उत्पादन तथा बिक्री वितरण गर्न भने दिने निर्णय भएको थियो ।
विकास निर्माण आयोजना सञ्चालनका लागि आवश्यक पर्ने ढुङ्गा, गिटी र बालुवालगायत निर्माण सामाग्रीको ढुवानी गर्न पाइने भएको छ । लक डाउन केहि खुकुलो भएपनि सामाजिक दुरी कायम गर्ने कुरामा भने सजग रहन आग्रह गरिएको छ ।
