इटहरी । बुढीगङ्गा मार्सल आर्ट क्लब इटहरी–४ बाट भारतको सिलिगुडी दिल्ली पब्लिक स्कूलमा आयोजना हुन गइरहेको अन्तर्राष्ट्रिय तेक्वान्दो प्रतियोगितामा भाग लिन जाने खेलाडीहरुलाई हौसला दिंदै विदाई गरिएको छ ।
उक्त प्रतियोगितामा भाग लिन जाने १५ जना खेलाडीहरुलाई इटहरी उपमहानगरपालिका वडा नम्बर ४ का वडा अध्यक्ष भक्त लामा र पूर्व अध्यक्ष चन्द्रप्रसाद भट्टराईले खादा माला लगाएर बिदाइ गरेका हुन् ।
क्लबका अध्यक्ष रमेश खत्रीको नेतृत्व र डोजाङ्ग प्रमुख अबिनास थापाको कमान्डमा खेलाडीको टोली जान लागेका छन् । क्लबका अध्यक्ष रमेश खत्रीले १५, १६ र १७ गते हुने प्रतियोगितामा इटहरीबाट १४ गते सिलीगुडी प्रस्थान गर्ने जानकारी दिए । अध्यक्ष खत्रीले क्लबमा आवद्ध खेलाडीहरु अब्बल र सक्षम भएकाले अत्यधिक मात्रामा मेडलहरु जित्न दाबी गरे ।
